Пролог
24.07.2024. Соат ба вақти Кӯлоб 08:00 дақиқа. Дар варзишгоҳи навбунёди СССР мусобиқа барои ба даст овардани Ҷоми ба номи Зоҳир Ҳайдаров, миёни хурдсолони соли таваллудашон 2009-2010 (U14) шуруъ шуд. Ҳайдаров З. аз мураббиёни собиқи КФ Равшани номдор дар солҳои советӣ ва аввали истиқлолият аст, ки дастаро аз нестӣ нигаҳ дошт. Худоро шукр, ҳоло зиндаву саломат аст…
Дар ин сабқат 8 даста аз тамомии водии Кӯлоб ширкат кард:
- Балҷувон
- СССР
- Равшан
- Мактаби Футболи махсус
- Андаробод
- Мактаби махсуси №4–уми вилоятӣ
- Муассисаи мактаби варзишии ш. Кӯлоб
- 8. Боғи Ҳабиби Муъминобод
Дебюти бебарор
КФ СССР дар бозии нахустин бо ҳисоби 3:2 шикаст хӯрд. Зимнан, суҳбати равоншиносӣ ва мотиватсияи психологӣ бо бачаҳо лозим буд. Дар бозии баъдӣ СССР ислоҳ шуда, бо ҳисоби теннисии 6:0 пирӯз гашта, сипас дар гурӯҳаш бар ҳама дастаҳои боқимонда зафар ёфта, ба финал баромад.
Эпилог
25.07.2024. Соат ба вақти Кӯлоб 10:00 дақиқа. Дар финал СССР-ро дастаи маъруфи Равшани Кӯлоб интизор буд. Касе намедонад, бояд донад, ки дастпарварони Равшан ин бразилиявиҳои маҳаллиянд, ки касеву чизеро писанд намекунанд. Вале КФ СССР ҳам туҳфаи осмонӣ-подарка нест!
Бозӣ тезу тунд давом мекард. Равшан ба пеш баромад, вале СССР баъдан 2 гол зада, бозиро сӯи пирӯзӣ кашид. КФ Равшан барои ба овер-тайм бурдани бозӣ ҳуҷумҳои барқосо мекард. Вале дар дақиқаи охирини қисмати 2-ум, СССР дар ҳуҷуми барқосои контрнабард, боз 1 голи зебое зада, Равшанро ба капитулятсия маҷбур намуд.
КФ СССР дар нахустин сабқати баъди соҳиб шудан ба стадиони муосиру замонавӣ аввалин Ҷомашро ба даст овард. Ва бовар кун, хонанда, ин аввали кор аст. Пирӯзиҳо моро дар пешанд. Зеро Мо Метавонем!
М. Мубориз
СССР
