– Милан бо Наполи бозӣ кард. Милан мусбӣ ва Наполи бозиро бохт.
– Истиқлол дар ин бозӣ бар Хуҷанд дастболо шуд. Хуҷанд тавонист бо ғалабаи навбатиаш ҷояшро дар зинаҳои аввали ҷадвал мустаҳкам кунад.
***
-Дарвозабон тӯбро дошта гирифт. Сад афсӯс, ки гол шуд.
***
– Бозӣ ба давраи ниҳоиаш расида истодааст. Мухлисон ягон голзанию муштзанию ғаврак – ҷавраки ҳарифонро дида натавониста, зиқу сархам, афсурдаҳолу ба асабоният аз варзишгоҳ бо суръати кайҳонӣ парида-парида, баъзеяш ҷаҳида-ҷаҳида гурехта рафта истодааст.
***
– Вазъияти хавфнок дар назди дарвозаи ҳариф. Акаи Ҷамил тӯбро оҳиста ба пеши пои бозингари ҳариф равона сохт. Ӯ чолокона, бо як маҳорати хоса, олиҷанобона, устокорона тӯбро ба тӯри дарвозаашон дохил кард. Гол! Ана маҳорату ана истеъдод!
***
– Робинио ҳамин хел зарбаи сахт зад, ки он рост ба дарвоза ворид шуд. Маъзарат, маъзарат, тӯб аз болочӯби дарвоза гузашта, ба дасти мухлисон бархӯрд.
***
– Бо либоси сафед соҳибони майдон-вахшиҳо, бо либоси гелосмонанд меҳмон-ҳулбукиҳо. Ҳам дар суръат, нигоҳдории тӯб, фанду фиребу найранг, зарбаҳои зиёд задан соҳибони майдон пешсафанд. Ба ин нигоҳ накарда ҳулбукиҳо дар дақиқаи 95-ум ғалаба ба даст оварданд. Офарин бозингарони сафедпӯш-вахшиҳо!
***
-Бозӣ чунон шавқовар, тезу тунд, аҷибу дилписанд, диданӣ, ҳаловатбахш гузашта истодааст, ки…лекин аз чи бошад тамошобинон саросемавор баромада рафта истодаанд.
Нурулло Ҳасанов,
рӯзноманигор
